“Pse po përdorim Inteligjencën Artificiale (IA)?” Ky duket të jetë qëndrimi i pothuajse gjysmës (48%) së punonjësve, sipas një studimi të ri që shqyrton adoptimin e IA-së në biznes. Edhe pse shumica (85%) e punonjësve inkurajohen të mbështeten te IA për detyrat e tyre, shumë prej tyre nuk e dinë arsyen. Ndërsa punonjësit duket se i ndiejnë vërtet përfitimet e IA-së, duke përmendur rritjen e produktivitetit dhe motivimit, çështja kryesore duket se lidhet me menaxherët e tyre. Sondazhi, i realizuar nga Culture Amp, vë në dukje një shkëputje midis strategjisë së korporatës për IA-në dhe mënyrës se si menaxherët e komunikojnë (ose jo) këtë me ekipet e tyre. Sondazhi gjithashtu thekson se jemi ende në fazat e hershme të revolucionit të IA-së dhe se ndikimi i kësaj teknologjie te fuqia punëtore dhe rolet individuale ende nuk është bërë plotësisht i dukshëm. Raporti i Culture Amp, me titull “Si ndihen vërtet punonjësit për IA-në në punë”, cilësohet si një pikë referimi; si botim i parë i këtij lloji, ai pritet të përcaktojë rrugëtimin e IA-së në vendin e punës gjatë viteve në vijim. Gjetjet fillestare ngrenë pyetje mbi mënyrën se si po prezantohet dhe përdoret realisht IA në bizneset anembanë botës. Me 112,000 të anketuar në 123 biznese globale, raporti ofron një nga pasqyrimet më të qarta dhe më të rëndësishme mbi përdorimin e IA-së në biznes deri më tani. “Punonjësit na thonë se i kuptojnë rreziqet, i përdorin mjetet dhe ndihen më produktivë,” vëren Amy Lavoie, Zëvendëspresidente e ‘People Science’ në Culture Amp. “Kjo nuk është një fuqi punëtore që i reziston ndryshimit. Kjo është një fuqi punëtore që e ka bërë pjesën e saj dhe po pret që drejtuesit të bëjnë pjesën e tyre.” Mungesa e një drejtimi të qartë nga menaxhmenti mund të mos jetë plotësisht faji i menaxherëve individualë. Në disa raste, drejtimi i korporatës për përdorimin e IA-së mund të jetë ende “në fazë zhvillimi”, ndërsa drejtuesit presin udhëzime më të qarta për t’ua komunikuar ekipeve të tyre. “Ne nuk e dimë me siguri se cilat role do të riformësohen nga IA, cilat aftësi do ta ruajnë vlerën e tyre, apo si do të duket një shteg karriere pas tre vitesh,” thotë Lavoie. “Si pasojë, drejtuesit mund të zgjedhin të heshtin, sepse të mos thuash asgjë duket më e sigurt sesa të thuash diçka që mund të rezultojë e gabuar.” Pra, cila është zgjidhja? Si mund t’ia dalin mbanë punonjësit që e kanë të vështirë të gjejnë kuptim në përdorimin e Inteligjencës Artificiale (IA), përballë mungesës së udhëzimeve të qarta për përdorimin e saj? Lavoie përfundon: “Gjëja më e dobishme që një drejtues mund të bëjë tani është të pranojë se plani nuk ka përfunduar ende dhe, pavarësisht kësaj, të vazhdojë komunikimin. Ajo që u duhet punonjësve prej jush në këtë moment nuk është siguria absolute, por sinqeriteti.
Burimi: TechRadar.com
